ਮਿੱਟੀ, ਅੱਗ ਤੇ ਪੌਣ - ਮਨਮੋਹਨ ਸਿੰਘ ਦਾਊਂ
ਮਿੱਟੀ-
ਮਿੱਟੀ ਵਿੱਚ ਖ਼ੁਸ਼ਬੋ ਹੁੰਦੀ ਹੈ,
ਸਿਰਜਣਾ ਲਈ ਛੁਪੀ ਛੋਹ ਹੁੰਦੀ ਹੈ,
ਤ੍ਰੇਹ ਬੁਝਾਵਣ ਲਈ ਖੋਹ ਹੁੰਦੀ ਹੈ,
ਰਿਸ਼ਤੇ ਗੰਢਦੀ ਕਨਸੋਅ ਹੁੰਦੀ ਹੈ,
ਮਿੱਟੀ ਵਿੱਚ ਖ਼ੁਸ਼ਬੋ ਹੁੰਦੀ ਹੈ।
ਅੱਗ-
ਅੱਗ ਦੇ ਵਿੱਚ ਗੀਤ ਹੁੰਦਾ ਹੈ,
ਲਪਟਾਂ ਵਿੱਚ ਸੰਗੀਤ ਹੁੰਦਾ ਹੈ,
ਦਿਲ ਤੋਂ ਵਿੱਛੜਿਆ ਕੋਈ ਮੀਤ ਹੁੰਦਾ ਹੈ,
ਜੋ ਰਾਖ ’ਚ ਸੁੱਤਾ ਸਿੱਲ ਵਾਂਗੂ ਸੀਤ ਹੁੰਦਾ ਹੈ,
ਅੱਗ ’ਚ ਗੀਤ ਹੁੰਦਾ ਹੈ।
ਪੌਣ-
ਪੌਣ ’ਚ ਜੀਂਦੇ ਬੋਲ ਹੁੰਦੇ ਨੇ,
ਜੋ ਹਾਜ਼ਰ-ਨਾਜ਼ਰ ਰੂਹ ਦੇ ਕੋਲ ਹੁੰਦੇ ਨੇ,
ਸਮਾਂ ਲੰਘਣ ’ਤੇ ਤੋਲ ਹੁੰਦੇ ਨੇ
ਸੁਣਨ ਵਾਲੇ ਅਬੋਲ ਹੁੰਦੇ ਨੇ
ਪੌਣ ’ਚ ਜੀਂਦੇ ਬੋਲ ਹੁੰਦੇ ਨੇ।
