ਨੀਹਾਂ ਵਿੱਚ ਚਿਣਿਆ ਸੀ ਜਦ ਛੋਟਿਆਂ ਫਰਜੰਦਾਂ ਨੂੰ
ਧਰਤੀ ਦੱਸ ਕਿੰਨੀ ਰੋਈ ਪੁੱਛਾਂਗੇ ਕੰਧਾਂ ਨੂੰ
ਅੰਬਰਾਂ ਦਾ ਹਾਲ ਕੀ ਹੋਇਆ ਕਹਿਰ ਨੂੰ ਵੇਖਦਿਆਂ
ਸਾਕਾ ਇਹ ਯਾਦ ਕਰ ਲਿਓ ਧੂਣੀਆਂ ਸੇਕਦਿਆਂ
ਸਾਕਾ ਕਿਤੇ ਭੁੱਲ ਨਾ ਜਾਇਓ ਧੂਣੀਆਂ ਸੇਕਦਿਆਂ
ਰੁੱਤਾਂ ਨੇ ਦਿੱਤਾ ਉਲਾਂਭਾ ਸਰਸਾ ਦੇ ਪਾਣੀ ਨੂੰ
ਰੋੜ੍ਹ ਨ੍ਹੀ ਸਕਦਾ ਵੇ ਤੂੰ ਪੁੱਤਰਾਂ ਦੇ ਦਾਨੀ ਨੂੰ
ਸਿਦਕ ਦੀਆਂ ਪੈੜਾਂ ਵੇਖੋ ਧਰਤ ਨੂੰ ਠੇਕਦੀਆਂ
ਸਾਕਾ ਇਹ ਯਾਦ ਕਰ ਲਿਓ ਧੂਣੀਆਂ ਸੇਕਦਿਆਂ
ਸਾਕਾ ਕਿਤੇ ਭੁੱਲ ਨਾ ਜਾਇਓ ਧੂਣੀਆਂ ਸੇਕਦਿਆਂ
ਗਾਉਂਦੇ ਤਾਂ ਖੁਸ਼ੀ ਖੁਸ਼ੀ ਨੇ ਕਿੱਸੇ ਦਿਲਦਾਰਾਂ ਦੇ
ਘੁੰਮਦੇ ਨੇ ਵਾਂਗ ਗਵਾਰਾਂ ਮੁੰਡੇ ਸਰਦਾਰਾਂ ਦੇ
ਹੱਸਦੀ ਦੀਵਾਰ ਵੀ ਹੋਣੀ ਇਨ੍ਹਾਂ ਨੂੰ ਵੇਖਦਿਆਂ
ਸਾਕਾ ਇਹ ਯਾਦ ਕਰ ਲਿਓ ਧੂਣੀਆਂ ਸੇਕਦਿਆਂ
ਸਾਕਾ ਕਿਤੇ ਭੁੱਲ ਨਾ ਜਾਇਓ ਧੂਣੀਆਂ ਸੇਕਦਿਆਂ
ਸਿਜਦੇ ਨੂੰ ਤੁਰ ਪਓ ਲੋਕੋ ਨੰਗੇ ਕਰ ਪੈਰਾਂ ਨੂੰ
ਬੁਰਜ ਵਿੱਚ ਜਾਕੇ ਵੇਖਿਓ ਬੱਚਿਆਂ ਦੀਆਂ ਠਹਿਰਾਂ ਨੂੰ
ਵੇਖਿਓ ਫਿਰ ਆਉਣਾ ਪਸੀਨਾ ਮੱਥਾ ਟੇਕਦਿਆਂ
ਸਾਕਾ ਇਹ ਯਾਦ ਕਰ ਲਿਓ ਧੂਣੀਆਂ ਸੇਕਦਿਆਂ
ਸਾਕਾ ਕਿਤੇ ਭੁੱਲ ਨਾ ਜਾਇਓ ਧੂਣੀਆਂ ਸੇਕਦਿਆਂ
ਗੁਰਦੀਪ ਸਿੰਘ ਢਿੱਲੋਂ
