ਅਸੀਂ ਓਥੋਂ ਦੇ ਵਾਸੀ ਹਾਂ - ਨਿਮਰਬੀਰ ਸਿੰਘ

ਅਸੀਂ ਓਥੋਂ ਦੇ ਵਾਸੀ ਹਾਂ - ਨਿਮਰਬੀਰ ਸਿੰਘ

ਘੁੰਡ  ਚੱਕਦੀ  ਕੁਦਰਤ ਰਾਣੀਂ

ਘੁਲਦੀ ਕੰਨਾਂ ਵਿੱਚ ਗੁਰਬਾਣੀਂ

ਪੈਂਦੀ  ਚਾਟੀ  ਵਿੱਚ  ਮਧਾਣੀ

ਦੁੱਧ  ਰਿੜਕੇ  ਕੋਈ  ਸੁਆਣੀਂ

ਤੜਕੇ  ਜਾਣ  ਖ਼ੇਤਾਂ  ਨੂੰ ਹਾਣੀਂ

ਜਿੱਥੇ  ਰੋਟੀ  ਵੰਡ  ਕੇ ਖਾਣੀਂ

ਅਸੀ  ਓਥੋਂ  ਦੇ  ਵਾਸੀ  ਹਾਂ

ਜਿੱਥੇ ਜੁੜੇ ਬਾਬਿਆਂ ਦੀ ਢਾਣੀਂ

ਅਸੀਂ ਓਥੋਂ ਦੇ ਵਾਸੀ ਹਾਂ |

ਜਿੱਥੇ   ਪੌਣ   ਸ਼ੂਕਦੀ    ਆਵੇ

ਪੁੱਛਦੀ  ਮਹਿਕਾਂ  ਦੇ ਸਿਰਨਾਂਵੇਂ

ਸਬ  ਨੂੰ  ਲੈਂਦੀ  ਵਿੱਚ  ਕਲਾਵੇ

ਨਾਲੇ  ਕੁਦਰਤ  ਹੱਸੇ - ਗਾਵੇ

ਪਈ  ਕਲੀ - ਕਲੀ  ਮੁਸਕਾਵੇ

ਜਿੱਥੇ ਹਰ ਕੋਈ ਢੋਲੇ ਦੀਆਂ ਲਾਵੇ

ਅਸੀ  ਓਥੋਂ  ਦੇ  ਵਾਸੀ  ਹਾਂ

ਜਿੱਥੇ ਸਿਰ ਝੁਕਦਾ ਵੱਡਿਆਂ ਸਾਂਹਵੇਂ

ਅਸੀਂ ਓਥੋਂ ਦੇ ਵਾਸੀ ਹਾਂ |

ਖੇਤਾਂ  ਵਿੱਚ  ਸੁਰਤਾਂ  ਭੁਲਾਈਆਂ

ਦਾਤੀਆਂ ਉਂਗਲਾਂ ਤੇ ਮਰਵਾਈਆਂ

ਪਾਟੀਆਂ ਪੈਰਾਂ ਦੀਆਂ ਵਿਆਈਆਂ

ਭੁੱਖਾਂ  - ਤੇਹਾਂ   ਵੀ  ਹੰਢਾਈਆਂ

ਜ਼ਰੀਆਂ ਕੁਦਰਤ ਦੀਆਂ ਮਨਆਈਆਂ

ਜਿੱਥੇ  ਕੀਤੀਆਂ  ਸਖ਼ਤ ਕਮਾਈਆਂ

ਅਸੀ  ਓਥੋਂ  ਦੇ  ਵਾਸੀ  ਹਾਂ

ਜਿੱਥੇ ਮਿਹਨਤਾਂ ਨਾਲ ਚੜਾਈਆਂ

ਅਸੀਂ ਓਥੋਂ ਦੇ ਵਾਸੀ ਹਾਂ |

ਜੋ ਸੱਭਿਆਚਾਰ ਨੂੰ ਲਾਵੇ ਖੋਰਾ

ਉਹ ਜ਼ੁਬਾਨ ਨਾਂ ਬੋਲੀਏ ਭੋਰਾ

ਸਾਡੀਆਂ ਦਾਤੇ ਦੇ ਹੱਥ ਡੋਰਾਂ

ਚੜੀਆਂ ਰਹਿਣ ਸਦਾ ਹੀ ਲੋਰਾਂ

ਕਿਸੇ ਨੂੰ ਬੋਲ ਨਾ ਬੋਲੀਏ ਕੌੜਾ

ਜਿੱਥੇ ਹਰ ਬੰਦਾ ਸੱਚਾ-ਕੋਰਾ

ਅਸੀਂ ਓਥੋਂ ਦੇ ਵਾਸੀ ਹਾਂ 

ਜਿੱਥੇ ਪਿਆਰ ਦੀਆਂ ਨਾਂ ਥੋੜਾਂ

ਅਸੀਂ ਓਥੋਂ ਦੇ ਵਾਸੀ ਹਾਂ |

ਜਿੱਥੇ  ਘਰ  ਛੋਟੇ ,ਵੱਡੇ ਕਿਰਦਾਰ

ਬੋਲੀ ਵਿੱਚ ਲਿਆਕਤ ਅਤੇ ਪਿਆਰ

ਹੋਵੇ  ਸਭ  ਧਰਮਾਂ  ਦਾ  ਸਤਿਕਾਰ

ਪਿੰਡ  ਤੇ   ਖੇਤ   ਸਾਡਾ  ਸੰਸਾਰ

ਸਿਰ  ਤੇ  ਹੱਥ  ਰੱਖਦਾ  ਕਰਤਾਰ

ਜਿੱਥੇ  ਘੁੱਗ  ਵੱਸਦੇ  ਪਰਿਵਾਰ

ਅਸੀ  ਓਥੋਂ  ਦੇ  ਵਾਸੀ  ਹਾਂ

ਜਿੱਥੇ ਦਿਲਾਂ ਚ੍ ਨਾਂਹੀ ਖ਼ਾਰ

ਅਸੀਂ ਓਥੋਂ ਦੇ ਵਾਸੀ ਹਾਂ |

-----੦-----

ਅੱਲ੍ਹਾ ਮੀਆਂ ਥੱਲੇ ਆ - ਸਾਈਂ ਅਖ਼ਤਰ ਲਹੌਰੀ

ਅੱਲ੍ਹਾ ਮੀਆਂ ਥੱਲੇ ਆ - ਸਾਈਂ ਅਖ਼ਤਰ ਲਹੌਰੀ

ਅੱਲ੍ਹਾ ਮੀਆਂ ਥੱਲੇ ਆ, ਆਪਣੀ ਦੁਨੀਆਂ ਵਿਹੰਦਾ ਜਾ,

ਜਾਂ ਅਸਮਾਨੋਂ ਰਿਜ਼ਕ ਵਰ੍ਹਾ ਜਾਂ ਫਿਰ ਕਰ ਜਾਂ ਮੁੱਕ ਮੁਕਾ।

ਤੈਨੂੰ ਧੀ ਵਿਆਹੁਣੀ ਪੈਂਦੀ । ਨਾਨਕੀ ਛੱਟ ਬਣਾਣੀ ਪੈਂਦੀ ।

ਰੁੱਸੀ ਭੈਣ ਮਨਾਉਣੀ ਪੈਂਦੀ । ਲੱਥ ਜਾਂਦੇ ਸਭ ਤੇਰੇ ਚਾਅ ।

ਅੱਲ੍ਹਾ ਮੀਆਂ ਥੱਲੇ ਆ !........

ਤੇਰੇ ਘਰ ਨਾ ਦਾਣੇ ਹੁੰਦੇ । ਪਾਟੇ ਲੇਫ ਪੁਰਾਣੇ ਹੁੰਦੇ ।

ਕਮਲ਼ੇ ਲੋਕ ਸਿਆਣੇ ਹੁੰਦੇ । ਪਾ ਦੇਂਦੇ ਤੈਨੂੰ ਘਬਰਾ ।

ਅੱਲ੍ਹਾ ਮੀਆਂ ਥੱਲੇ ਆ !........

ਮੁੱਲਾਂ ਕਾਜ਼ੀ ਢਿੱਡੋਂ ਖੋਟੇ । ਵੱਢੀ ਖਾ ਖਾ ਹੋ ਗਏ ਮੋਟੇ ।

ਸੱਚ ਆਖਾਂ ਤੇ ਮਾਰਨ ਸੋਟੇ । ਮਗਰੋਂ ਦੇਂਦੇ ਫਤਵਾ ਲਾ ।

ਅੱਲ੍ਹਾ ਮੀਆਂ ਥੱਲੇ ਆ !........

ਬੁਸ਼ ਬਣਿਆ ਫਰਊਨ ਖ਼ੁਦਾਇਆ । ਖ਼ਲਕ ਦੀ ਨੱਪੀ ਧੌਣ ਖ਼ੁਦਾਇਆ ।

ਖਾਏ ਇਨਸਾਨੀ ਲੂਣ ਖ਼ੁਦਾਇਆ । ਆ ਕੇ ਸਾਡੀ ਧੌਣ ਛੁਡਾ ।  

ਅੱਲ੍ਹਾ ਮੀਆਂ ਥੱਲੇ ਆ !........

ਇਕ ਵਾਸ਼ਿੰਗਟਨ ਦਾ ਬਾਸ਼ਿੰਦਾ । ਅਜੇ ਤੀਕ ਜੋ ਨਾ ਸ਼ਰਮਿੰਦਾ ।

ਜਾਪਾਨੀ ਨੇ ਫੇਰ ਵੀ ਜ਼ਿੰਦਾ । ਇਹਦੇ ਮੂੰਹ ਵੀ ਜਿੰਦਰੇ ਲਾ । 

ਅੱਲ੍ਹਾ ਮੀਆਂ ਥੱਲੇ ਆ !........

ਮੰਡੀਆਂ ਗੈਰਾਂ ਹੱਥ ਫੜਾਈਆਂ । ਉਤੋਂ ਅੱਤ ਚੁੱਕੀ ਧੜਵਾਈਆਂ ।

ਛੱਡ ਦੇ ਹੁਣ ਤੂੰ ਬੇਪਰਵਾਹੀਆਂ । ਤੀਜਾ ਜਗਤ ਆਜ਼ਾਦ ਕਰਾ । 

ਅੱਲ੍ਹਾ ਮੀਆਂ ਥੱਲੇ ਆ !........

 'ਗੋਰਬੇ'(ਚੇਵ) ਕਰ ਕੇ ਰੂਸ ਦੇ ਟੋਟੇ । ਪੰਧ ਅਵਾਮ ਦੇ ਕੀਤੇ ਖੋਟੇ ।

ਨਿੱਜਕਾਰਾਂ ਹੱਥ ਦੇ ਕੇ ਸੋਟੇ । ਰੂਸ 'ਚ ਦਿੱਤੀ ਭੁੱਖ ਨਚਾ ।

ਅੱਲ੍ਹਾ ਮੀਆਂ ਥੱਲੇ ਆ !........

ਇਕ ਦੂਜੇ 'ਤੇ ਪਾਣ ਲਈ ਗ਼ਲਬਾ । ਕਰ ਛੱਡਿਆ ਨੇ ਕਾਬਲ ਮਲਬਾ ।

ਬੰਦ ਸਕੂਲ ਤੇ ਮਰ ਗਏ ਤਲਬਾ । ਇਹਨਾਂ ਤੋਂ ਇਸਲਾਮ ਬਚਾ ।

ਅੱਲ੍ਹਾ ਮੀਆਂ ਥੱਲੇ ਆ !........ 

ਮੁੱਲਾਂ ਪੰਡਤ ਧਰਮ ਲਤਾੜਿਆ । ਦੋਹਾਂ ਘਰ ਤੇਰਾ ਕਬਜ਼ਾਇਆ ।

ਪੰਡਤ ਮਸਜਦ ਮਲਬਾ ਚਾਇਆ । ਮੁੱਲਾਂ ਦਿੱਤੇ ਮੰਦਰ ਢਾਹ ।  

ਅੱਲ੍ਹਾ ਮੀਆਂ ਥੱਲੇ ਆ !........

ਜੰਗ ਅਮਰੀਕੀ ਲੜ ਅਫ਼ਗਾਨਾਂ । ਘਰ ਕੀਤੇ ਬਰਬਾਦ ਨਾਦਾਨਾਂ ।

ਮੇਰੇ ਦੇਸ਼ 'ਚ ਖੋਲ ਦੁਕਾਨਾਂ । ਘਰ ਘਰ ਦਿੱਤੇ ਵੈਣ ਪਵਾ । 

ਅੱਲ੍ਹਾ ਮੀਆਂ ਥੱਲੇ ਆ !........