ਗੋਲੀਆਂ - ਜਰਨੈਲ ਸਿੰਘ ਘੋਲੀਆ
ਲਓ ਜੀ ਵੀਰ ਜੀ ਭੈਣ ਜੀ ਭਰਾ ਜੀ,
ਗੋਲੀਆਂ ਵਿਕਣੀਆਂ ਗਈਆਂ ਅੱਜ ਆ ਜੀ |
ਮੇਰੇ ਕੋਲ ਕਈ ਪਰਕਾਰ ਦੀਆਂ ਗੋਲੀਆਂ,
ਦੁਖਦੇ ਹੋਏ ਸਿਰ ਤੇ ਬੁਖਾਰ ਦੀਆਂ ਗੋਲੀਆਂ |
ਪੰਨਿਆਂ 'ਚ ਬੰਦ ਥੋੜੇ ਭਾਰ ਦੀਆਂ ਗੋਲੀਆਂ,
ਕੁੱਖਾਂ ਵਿੱਚ ਬੱਚੀਆਂ ਨੂੰ ਮਾਰ ਦੀਆਂ ਗੋਲੀਆਂ |
ਗੋਲੀਆਂ ਇਹ ਮੈਚ ਵੀ ਹਰਾ ਵੀ ਦਿੰਦੀਆਂ ਨੇ,
ਵੱਢੇ ਵੱਢੇ ਬੰਦੇ ਵਿਕਵਾ ਵੀ ਦਿੰਦੀਆਂ ਨੇ |
ਗੋਲੀਆਂ ਇਹ ਕੌੜੀਆਂ ਕਸੈਲੀਆਂ ਤੇ ਮਿੱਠੀਆਂ,
ਹੋ ਸਕਦਾ ਏ ਤੁਸੀ ਪਹਿਲਾਂ ਵੀ ਹੋਣ ਡਿੱਠੀਆਂ |
ਗੋਲੀਆਂ ਇਹ ਦੰਗਿਆਂ 'ਚ ਵਰਤੀਆਂ ਜਾਂਦੀਆਂ,
ਕਈਆਂ ਕੋਲੋ ਖੋਹਦੀਆਂ ਸੰਧੂਰ ਤੇ ਪਰਾਂਦੀਆਂ |
ਗੋਲੀਆਂ ਇਹ ਕਦੀ ਰਾਖੀ ਕਰਦੀਆਂ ਨੋਟਾਂ ਦੀ,
ਪੁੱਠੀ ਸਿੱਧੀ ਗਿਣਤੀ ਕਰਾਉਦੀਆਂ ਨੇ ਵੋਟਾਂ ਦੀ |
ਏਹੇ ਖਾ ਕੇ ਰੇਲਾਂ ਵੀ ਚਲਾ ਸਕਦੇ ਓ,
ਤੋਪਾਂ ਅਤੇ ਚਾਰੇ ਵੀ ਪਚਾ ਸਕਦੇ ਓ |
ਲੀਡਰ ਤੇ ਬਾਬੇ ਇਹ ਗੋਲੀਆਂ ਵਰਤਦੇ ਨੇ,
ਇਹਨਾਂ ਨਾਲ ਕੰਨਿਆਂ ਇਹ ਭੋਲੀਆਂ ਵਰਤਦੇ ਨੇ |
ਗਿੱਲ ਜਰਨੈਲ ਕੋਲ ਹੋਰ ਵੀ ਨੇ ਗੋਲੀਆਂ,
ਡਾਢਿਆਂ ਤੋਂ ਡਰਦੇ ਨੇ ਕੁਝ ਕੁ ਲਕੋਲੀਆਂ ||
No comments:
Post a Comment