ਗੱਲਾਂ - (1) ਕੁਲਦੀਪ ਸਿੰਘ ਨੀਲਮ
ਗਲਾਂ ਕਰਦਿਆਂ ਗਲਾਂ ਚੋਂ ਗਲ ਚਲੀ,ਕਰਦਾ ਹਰ ਕੋਈ ਏ ਇਨਸਾਨ ਗਲਾਂ।ਚੋਰ ਯਾਰ ਬਦਮਾਸ਼ ਵੀ ਕਰਨ ਗਲਾਂ,ਦੇਵੀ ਦੇਵਤੇ ਕਰਨ ਭਗਵਾਨ ਗਲਾਂ।
ਗਲਾਂ ਕਰਨ ਦਾ ਝੱਲ ਜਨਾਨੀਆਂ ਨੂੰ,ਬੁਢੇ ਬੱਚੇ ਤੇ ਕਰਨ ਜਵਾਨ ਗਲਾਂ।
ਇਹਨਾਂ ਗਲਾਂ ਦੇ ਕਈ ਪ੍ਰਕਾਰ ਹੁੰਦੇ,ਆਮ ਖਾਸ ਤੇ ਗੁਪਤ ਗਿਆਨ ਗਲਾਂ।
ਗਲਾਂ ਗ੍ਹੂੜ੍ਹੀਆਂ ਹੁਸਨ ਤੇ ਇਸ਼ਕ ਦੀਆਂ,ਨਵੀਆਂ ਪੁਰਾਣੀਆਂ ਤੇ ਅਣਜਾਨ ਗਲਾਂ।
ਰਸ ਗਲਾਂ ਦੇ ਬੜੇ ਨਿਰਾਲੜੇ ਨੇ, ਕੌੜੀਆਂ ਮਿਠੀਆਂ ਤੇ ਮਿਹਰਬਾਨ ਗਲਾਂ।
ਐਵੇਂ ਬੈਠੇ ਕਈ ਝੱਖ ਮਾਰਦੇ ਨੇ,ਕੋਈ ਕਰਦੇ ਸੁਘੜ ਸੁਜਾਨ ਗਲਾਂ।
ਸੁਣਕੇ ਬਚਿਆਂ ਦੇ ਤੋਤਲੇ ਬੋਲ ਪਿਆਰੇ,ਸੀਨੇ ਮਾਪਿਆਂ ਦੇ ਠੰਡ ਪਾਣ ਗਲਾਂ।
ਗਲਾਂ ਟੱਬਰ ਦੀ ਸਾਂਝ ਵਧਾਂਦੀਆਂ ਨੇ,ਕਦੇ ਕਰਦੀਆਂ ਬਹੁਤ ਨੁਕਸਾਨ ਗਲਾਂ।
ਵੇਲਾ ਵੇਖਕੇ ਜੋ ਨਾ ਗਲ ਕਰਦੇ,ਵਾਧੂ ਕਰਦੇ ਉਹ ਇਨਸਾਨ ਗਲਾਂ।
ਕੋਈ ਗਲਾਂ ਦਾ ਖਟਿਆ ਖਾਂਵਦਾ ਏ,ਲਾਕੇ ਮਿਰਚ-ਮਸਾਲਾ ਸੁਨਾਣ ਗਲਾਂ।
ਕੋਈ ਝੂਠੀਆਂ ਸੱਚੀਆਂ ਛਾਪਦੇ ਨੇ,ਨਿਤ ਵੇਚਦੇ ਖ੍ਹੋਲ ਦੁਕਾਨ ਗਲਾਂ।
ਗਲਾਂ ਬਾਝ ਨਾ ਕੋਈ ਵਪਾਰ ਚਲੇ,ਰੁਪਈਆਂ ਡਾਲਰਾਂ ਦੇ ਢੇਰ ਲਾਣ ਗਲਾਂ।
No comments:
Post a Comment