Punjabi Meri Jaan

ਜ਼ਖਮ - ਜੁਗਰਾਜ ਸਿੰਘ‬ 
Zakham - Jugraj Singh

ਜੋ ਰੂਹ ਸਾਡੀ ਵਿੱਚ ਵੱਸਦੇ ਨੇ
ਉਹ ਮਰ ਕੇ ਵੀ ਤਾਂ ਮਰਨੇ ਨਾ!
ਜੋ ਜ਼ਖਮ ਦਿਲਾਂ ਤੇ ਉਕਰੇ ਨੇ
ਉਹ ਸਮਿਆਂ ਕੋਲੋਂ ਭਰਨੇ ਨਾ!

ਉਹ ਵਕਤ ਬੜਾ ਹੀ ਡਾਢਾ ਸੀ
ਸਾਡੇ ਹੱਡੀਂ ਓਹੋ ਰਚ ਚੁੱਕਿਆ
ਜੋ ਬਾਗੀ ਹੋਏ ਸੀ ਹਾਕਮ ਤੋਂ
ਸਿਵਾ ਉਨ੍ਹਾ ਦਾ ਮਚ ਚੁੱਕਿਆ
ਸਿਰ ਤੇ ਰੱਖ ਕੇ ਗੋਲੀ ਮਾਰੀ
ਹੱਥ ਬੰਨ ਕੇ ਪਿੱਛੇ ਪਰਨੇ ਨਾ!
ਜੋ ਜ਼ਖਮ ਦਿਲਾਂ ਤੇ ਉਕਰੇ ਨੇ
ਉਹ ਸਮਿਆਂ ਕੋਲੋਂ ਭਰਨੇ ਨਾ!

ਸਾਨੂੰ ਹਿੱਕ ਆਪਣੀ ਨਾਲ ਲਾ ਕੇ
ਪਿੱਠ ਤੇ ਵਾਰ ਚਲਾਉਦੇਂ ਰਹੇ
ਜੇਲ੍ਹਾਂ ਦੇ ਵਿੱਚ ਰੋਲਿਆ ਸਾਨੂੰ
ਫਾਂਸੀ ਤੇ ਲਮਕਾਉਦੇਂ ਰਹੇ
ਪੁੱਤ ਸ਼ੇਰਾਂ ਦੇ ਸ਼ੇਰ ਹੀ ਹੁੰਦੇ
ਕਦੇ ਘਾਹ ਉਹਨਾਂ ਨੇ ਚਰਨੇ ਨਾ!
ਜੋ ਜ਼ਖਮ ਦਿਲਾਂ ਤੇ ਉਕਰੇ ਨੇ
ਉਹ ਸਮਿਆਂ ਕੋਲੋਂ ਭਰਨੇ ਨਾ!

ਅਸੀਂ ਜੁਲਮ ਦੇ ਤਪਦੇ ਲੋਹੇ ਨੂੰ
ਰੱਤ ਆਪਣੀ ਨਾਲ ਠਾਰਾਗੇਂ
ਜਨਮ ਲਵਾਗੇਂ ਜਦ ਜਦ ਵੀ
ਇਹ ਜਿੰਦ ਕੌਮ ਤੋਂ ਵਾਰਾਗੇਂ
ਅਸੀਂ ਫਿਰ ਤੋਂ ਦੇਖੀ ਉੱਠ ਪੈਣਾ
ਇਹ ਦਾਬੇ ਬਹੁਤੇ ਜਰਨੇ ਨਾ!
ਜੋ ਜ਼ਖਮ ਦਿਲਾਂ ਤੇ ਉਕਰੇ ਨੇ
ਉਹ ਸਮਿਆਂ ਕੋਲੋਂ ਭਰਨੇ ਨਾ!