ਅੱਜ ਕੱਲ੍ਹ ਹਾਲ ਬਜੁਰਗਾਂ ਦਾ - ਜਗਜੀਤ ਸਿੰਘ "ਪਿਆਸਾ"
ਪੁਛਕੇ ਨਹੀਂ ਕੋਈ ਰਾਜ਼ੀ , ਅੱਜ ਕੱਲ੍ਹ ਹਾਲ ਬਜੁਰਗਾਂ ਦਾ |
ਸਾਂਭਣ ਨੂੰ ਉਂਝ ਫਿਰਦੇ ਸਾਰੇ ਮਾਲ ਬਜੁਰਗਾਂ ਦਾ ,
ਚੰਗੀ ਗੱਲ ਜੇ ਆਖਣ , ਕਹਿੰਦੇ ਰੌਲਾ ਪਾਉਂਦੇ ਐ |
ਅਨਪੜ੍ਹ ਹੋਕੇ ਪੜ੍ਹਿਆਂ ਲਿਖਿਆਂ ਨੂੰ ਸਮਝਾਉਂਦੇ ਐ |
ਔਖਾ ਹੋਇਆ ਰੱਖਣਾ ਜਰਾ ਖਿਆਲ ਬਜੁਰਗਾਂ ਦਾ ,
ਕਿਹੜੇ ਹਾਲ ਚ ਰਹਿੰਦੇ , ਕਿਦਾਂ ਵਕ਼ਤ ਲੰਘਾਉਂਦੇ ਨੇ |
ਰੂਹ ਉਹਨਾਂ ਦੀ ਸੌਖੀ ਹੈ ਜਾਂ ਦਰਦ ਹੰਢਾਉਂਦੇ ਨੇ |
ਹਰਦਮ ਪਿਆ ਕੂਕੇ ਸਿਰ ਤੇ ਕਾਲ ਬਜੁਰਗਾਂ ਦਾ ,
#
ਮਨਾਂ ਚ ਲੋਭ ਵਸਾਕੇ , ਮੂਹਰੇ ਲਾਇਆ ਗਰਜਾਂ ਨੂੰ |
ਜੁੰਮੇਵਾਰੀਆਂ ਭੁੱਲ ਗਏ ,ਨਾਲੇ ਭੁੱਲ ਗਏ ਫਰਜਾਂ ਨੂੰ |
ਸਮਝਣ ਲੱਗ ਪਏ ਬੋਝ ਤੇ ਮਾੜਾ ਹਾਲ ਬਜੁਰਗਾਂ ਦਾ
ਮਾਨ ਅਤੇ ਸਨਮਾਨ ਜੇ ਕਰਨਾ ਤੁਸੀਂ ਛੱਡ ਜਾਵੋਗੇ |
ਆਉਣ ਵਾਲੀਆਂ ਪੀੜ੍ਹੀਆਂ ਤੋ ਕਿੰਝ ਮਾਨ ਕਰਾਵੋਗੇ |
" ਪਿਆਸੇ "ਦਿਤਾ ਵਿਰਸਾ ਲਵੋ , ਸੰਭਾਲ ਬਜੁਰਗਾਂ ਦਾ
ਪੁਛਕੇ ਨਹੀਂ ਕੋਈ ਰਾਜ਼ੀ , ਅੱਜ ਕੱਲ੍ਹ ਹਾਲ ਬਜੁਰਗਾਂ ਦਾ |
ਸਾਂਭਣ ਨੂੰ ਉਂਝ ਫਿਰਦੇ ਸਾਰੇ ਮਾਲ ਬਜੁਰਗਾਂ ਦਾ ,
No comments:
Post a Comment