ਖਜ਼ਾਨ ਸਿੰਘ
ਕੁਛ ਪਰਛਾਵੇਂ ਹਨ, ਕੁਛ ਗੀਤ ਹਨ, ਸੁਗਾਤਾਂ ਹਨ।
ਲੈ ਕੇ ਆਇਆ ਹਾਂ, ਕੁਛ ਫੁੱਲ ਹਨ, ਰਾਤਾਂ ਹਨ।
ਯਾਦ ਕਰੇਂਗੀ ਤੂੰ, ਯਾਦ ਕਰਾਂਗਾ ਮੈਂ
ਕੁਛ ਬਚੇ ਹੰਝੂ ਹਨ, ਪਿਆਰੀਆਂ ਮੁਲਾਕਾਤਾਂ ਹਨ।
ਤੇਰੇ ਨਾਲ ਪਿਆਰ ਸੀ, ਝੂਠਾ ਨਾ ਸੀ,
ਹੁਣ ਕੇਵਲ ਵਲ ਵਲੇ ਹਨ, ਗੁਜ਼ਰੀਆਂ ਬਾਤਾਂ ਹਨ।
ਘਰ ਹੈ ਸੁੰਨਸਾਨ, ਪੰਛੀ ਵੀ ਹਨ ਖਾਮੋਸ਼,
ਕਮਰੇ ‘ਚ ਮੇਰੇ ਮੈਂ ਹਾਂ, ਜਾਂ ਕੁਛ ਬਰਸਾਤਾਂ ਹਨ।
ਗਮ ਦੀ ਦਹਿਲੀਜ਼ ਹੈ, ਵਿਹੜਾ ਹੈ ਸੁੰਨਸਾਨ,
ਅੱਖਰਾਂ ਦਾ ਕੁਛ ਸ਼ੋਰ ਹੈ, ਮੇਰੀ ਕਲਮ ਤੇਰੀਆਂ ਦੁਆਤਾਂ ਹਨ।
ਦੇਖਣ ਨੂੰ ਉਹੀ ਰਾਹ, ਸੜਕ ਤੇ ਮੀਲ ਪੱਥਰ,
ਪਰਛਾਵੇਂ ਹਨ, ਧੂੜ ਹੈ, ਕੁਛ ਸੁਹਣੀਆਂ ਮੁਲਾਕਾਤਾ ਹਨ।
ਤਾਰੇ ਹਨ, ਹਨੇਰੀ ਰਾਤ ਹੈ, ਬੱਦਲ ਹੈ ਤੇ ਮੈਂ ਹਾਂ ,
ਰਾਹ ‘ਚ ਹਾਂ ‘ਕੱਲ ਮੁਕੱਲਾ, ਫਿਰ ਉਡੀਕਦੀਆਂ ਪ੍ਰਭਾਤਾਂ ਹਨ।
ਅੱਖਾਂ ‘ਚੋਂ ਨੀਰ, ਪੈਰਾਂ ‘ਚ ਛਾਲੇ, ਆਹਾਂ ਦਾ ਸੇਕ ਕੀ,
ਕੀ ਨਹੀਂ ਮੇਰੇ ਯਾਰਾ, ਸਭ ਤੇਰੀਆਂ ਹੀ ਦਾਤਾਂ ਹਨ।
No comments:
Post a Comment