ਅੱਜ ਆਖਾਂ ਮੈਂ ਸ਼ਿਵ ਸ਼ਾਇਰ ਨੂੰ - ਰਵੇਲ ਸਿੰਘ ਇਟਲੀ
Shiv Shayar - Ravel Singh Italy
ਅੱਜ ਆਖਾਂ ਮੈਂ ਸ਼ਿਵ ਸ਼ਾਇਰ ਨੂੰ, ਕਿਤੇ ਫੇਰ ਬਟਾਲੇ ਆ ,
ਤੇ ਲੇ ਲੋਹੇ ਦੇ ਇੱਸ ਸ਼ਹਿਰ ਨੂੰ ਕੋਈ ਸੱਜਰਾ ਗੀਤ ਸੁਨਾ ।
ਕੋਈ ਭੱਠੀ ਵਾਲੀ ਉਡੀਕਦੀ ਫਿਰ ਪੀੜ ਪਰਾਗਾ ਪਾ ।
ਚੰਬੇ ਦੀ ਡਾਲੀ ਆਖ ਕੇ ਜ਼ਰਾ ਆ ਕੇ ਫੇਰ ਬੁਲਾ ।
ਤੇਰਾ ਸ਼ਿਕਰਾ ਯਾਰ ਉਡੀਕਦਾ ਫਿਰ ਜਿਗਰ ਦਾ ਮਾਸ ਖੁਆ ।
ਬਿਨ ਮਹਿਕੋਂ ਤੇਰੇ ਬਾਝ ਫਿਰ ਜ਼ਰਾ ਆ ਕੇ ਨਜ਼ਰ ਦੁੜਾ ।
ਅੱਜ ਕਲਮਾਂ ਵਾਲੇ ਸੌਂ ਗਏ ਫਿਰ ਆ ਕੇ ਟੁੰਬ ਜਗਾ ,
ਅੱਜ ਇਲਮਾਂ ਵਾਲੇ ਬੁੱਝ ਗਏ ਕੋਈ ਸੱਜਰੀ ਜੋਤ ਜਗਾ ।
ਅੱਜ ਗੀਤਾਂ ਵਾਲੇ ਲੁੱਟਦੇ ਕਈ ਲੱਚਰ ਗੀਤ ਬਨਾ ।
ਤੇ ਨਵੀਂ ਜਵਾਨੀ ਪੁੱਟਦੇ, ਬਿਨ ਸਿਰ ਪੈਰੇ ਹੀ ਗਾ ।
ਅੱਜ ਘਰ ਘਰ ਧੀਆਂ ਰੋਂਦੀਆਂ ਆ ਏਹਨਾਂ ਨੂੰ ਸਮਝਾ ।
ਆ ਝੂਠੇ ਇਸ਼ਕ ਤੋਂ ਮੋੜ ਲੈ ਕੋਈ ਚੰਗੇ ਰਾਹੇ ਪਾ।
ਆ ਗੰਮ ਦੀ ਲੰਮੀ ਰਾਤ ਨੂੰ ਫਿਰ ਹਿੱਜਰਾਂ ਵਿੱਚ ਲੰਘਾ ।
ਅੱਜ ਘਰ ਘਰ ਅੱਗਾਂ ਲੱਗੀਆਂ ਤੂੰ ਆ ਕੇ ਕਿਤੇ ਬੁਝਾ ।
ਇੱਸ ਸਹਿਕ ਰਹੀ ਤਹਿਜ਼ੀਬ ਨੂੰ ਕੋਈ ਦਾਰੂ ਨਵਾਂ ਪਿਆ ।
ਅੱਜ ਘਰ ਘਰ ਥੋਹਰਾਂ ਉੱਗੀਆਂ ,ਤੇ ਅੱਗਾਂ ਦੇ ਦਰਿਆ ,
ਸੱਭ ਪਿੱਪਲ ਬੋਹੜਾਂ ਵੱਢ ਕੇ ਕਈ ਰਿਸ਼ਤੇ ਲਏ ਮੁੱਕਾ ।
ਹਰ ਪਾਸੇ ਬੱਦਲ ਜੰਗ ਦੇ ,ਤੇ ਜ਼ਹਿਰਾਂ ਭਰੀ ਹਵਾ ।
ਆ ਅਮਨਾਂ ਦੇ ਫਿਰ ਗੀਤ ਲਿਖ ਤੇ ਸੱਭ ਦੇ ਕੰਨੀ ਪਾ ।
ਫਿਰ ਲੂਣਾ ਤੇ ਸਲਵਾਨ ਨੇ ਕਈ ਰਿਸ਼ਤੇ ਲਏ ਬਨਾ ।
ਮੁੜ ਏਦਾਂ ਬਨਣ ਨਾ ਜੋੜੀਆਂ ,ਆ ਏਧਰ ਕਲਮ ਚਲਾ ।
ਕੋਈ ਇੱਛਰਾਂ ਵਰਗੀ ਮਾਂ ਜਾਂ ਕੋਈ ਪੂਰਨ ਪੁੱਤ ਲਿਆ ।
ਉਹ ਗਲ਼ ਦੀ ਮਿੱਠੀ ਹੂਕ ਨੂੰ ,ਮੁੜ ਆ ਕੇ ਫੇਰ ਸੁਨਾ ।
ਬ੍ਰਿਹੋਂ ਦਾ ਸੁਲਾਨ ਤੂੰ ਤੇਰੀ ਵੱਖਰੀ ਹਰ ਅਦਾ ।
ਫਿਰ ਦਰਦਾਂ ਭਰੀ ਆਵਾਜ਼ ਨੂੰ ਜ਼ਰਾ ਭਰ ਦੇ ਵਿੱਚ ਫਿਜ਼ਾ ।
ਅੱਜ ਆਖਾਂ ਮੈਂ ਸ਼ਿਵ ਸ਼ਾਇਰ ਨੂੰ ਕਿਤੇ ਫੇਰ ਬਟਾਲੇ ਆ ।
No comments:
Post a Comment