ਦਿਲਜਾਨੀ - ਜਗਤਾਰ ਸਿੰਘ ਭਾਈ ਰੂਪਾ
Diljani - Jagtar Singh Bhairupar
ਖ਼ੁਦਾ ਦਾ ਵਾਸਤੈ ਅੰਮ੍ਰਿਤ ‘ਚ ਬਿਖ ਨਾ ਘੋਲ ਦਿਲਜਾਨੀ।
ਤੂੰ ਪਹਿਲਾਂ ਵਾਂਗਰਾਂ ਹੀ ਬੋਲ ਮਿੱਠੇ ਬੋਲ ਦਿਲਜਾਨੀ।
ਇਹ ਗਲੀਆਂ ਰਾਸਤੇ ਪਗਡੰਡੀਆਂ ਵਿਛੜੇ ਨਹੀਂ ਰਹਿਣੇ
ਕਿਤੇ ਤਾਂ ਮਿਲ ਹੀ ਜਾਵਣਗੇ ਹੈ ਦੁਨੀਆ ਗੋਲ ਦਿਲਜਾਨੀ।
ਕਿਸੇ ਉਸਤਾਦ ਕਾਮਿਲ ਦੀ ਕਰੇਂ ਸੁਹਬਤ ਅਗਰ ਕੁੱਝ ਦਿਨ
ਤਿਰੇ ਅਸ਼ਿਆਰ ਮਹਿਫ਼ਿਲ ਵਿੱਚ ਨਾ ਖਾਵਣ ਝੋਲ ਦਿਲਜਾਨੀ।
ਨਿਭਾ ਸਕਦਾ ਨਹੀਂ ਜੇਕਰ ਵਫ਼ਾ ਦਾ ਅਹਿਦ ਨਾ ਬੰਨ੍ਹੀ
ਖ਼ਰਾ ਹੁੰਦਾ ਨਾ ਅੱਧ-ਵਿਚਕਾਰ ਜਾਣਾ ਡੋਲ ਦਿਲਜਾਨੀ।
ਕਿਸੇ ਦੀ ਯਾਦ ਵਿੱਚ ਹੰਝੂ ਵਹਾਉਣਾ ਠੀਕ ਨਈਂ ਹੁੰਦਾ
ਤੂੰ ਇਹ ਮੋਤੀ ਇਵੇਂ ਮਿੱਟੀ ਦੇ ਵਿੱਚ ਨਾ ਰੋਲ਼ ਦਿਲਜਾਨੀ।
ਵਫ਼ਾ ਦੇ ਵਣਜ ਵਿੱਚ ਤਾਂ ਹਰ ਸਮੇਂ ਘਾਟਾ ਹੀ ਘਾਟਾ ਹੈ
ਨਾ ਵਾਜਬ ਮੁੱਲ ਮਿਲਦਾ ਹੈ ਨਾ ਪੂਰਾ ਤੋਲ ਦਿਲਜਾਨੀ।
ਤੇਰੇ ਮੁੜ ਆਉਣ ਦੀ ਆਸ਼ਾ ਵੀ ਹੁਣ ਦਮ ਤੋੜ ਚੱਲੀ ਏ
ਜੁਦਾਈ ਵਿੱਚ ਗੁਜ਼ਰ ਚੱਲਿਐ ਸਮਾ ਅਨਮੋਲ ਦਿਲਜਾਨੀ।
ਕਹੀਂ ਨਾ ਕਤਲ ਨੂੰ ਭੁੱਲਕੇ ਕਤਲ ਇਸ ਸ਼ਹਿਰ ਵਿੱਚ ਗ਼ਾਫ਼ਿਲ
ਨਹੀਂ ਤਾਂ ਕਤਲ ਹੋਵੇਂਗਾ ਮੇਰੇ ਅਣਭੋਲ ਦਿਲਜਾਨੀ।
No comments:
Post a Comment