'ਮਾਂ-ਬੋਲੀ' -ਆਸ਼ਿਕ ਲਾਹੌਰ
Maa boli - Aashiq Lahore
ਇਸ ਵਿੱਚ ਪੜ ਤੂੰ,
ਇਸ ਵਿੱਚ ਲਿਖ ਤੂੰ,
ਇਸ ਵਿੱਚ ਕਰ ਤਕਰੀਰਾਂ ।
'ਮਾਂ-ਬੋਲੀ' ਦਾ ਪੱਲਾ ਫੜ ਲੈ,
ਬਣ ਜਾਸਨ ਤਕਦੀਰਾਂ ।
ਸਾਡੇ ਦੇਸ਼ ਪੰਜਾਬ ਤੇ ਅਜ਼ਲੋਂ,
ਹੋਣੀ ਕਾਬਜ਼ ਹੋਈ,
'ਸੋਹਣੀਆਂ' ਵਿੱਚ ਝਨਾਂ ਦੇ ਡੁੱਬੀਆਂ,
ਮਹੁਰਾ ਖਾਧਾ ਹੀਰਾਂ ।
ਸਾਥੋਂ ਚੜਦੀ ਧਰਤੀ ਖੁੱਸੀ,
ਬੋਲੀ ਵੀ ਅੱਡ ਹੋਈ,
ਸਾਡੇ ਸਿਰ ਦੀ ਚੁੰਨੀ ਪਾਟੀ,
ਪੱਗ ਵੀ ਲੀਰਾਂ ਲੀਰਾਂ ।
ਸਾਨੂੰ ਡੁਸਕਣ ਵੀ ਨਾ ਦਿੰਦੇ,
ਮੂੰਹ 'ਤੇ ਜਿੰਦਰੇ ਲੱਗੇ,
ਸਾਨੂੰ ਹਿੱਲਣ ਵੀ ਨਾ ਦਿੰਦੇ,
ਛਣਕਨ ਨਾ ਜ਼ੰਜੀਰਾਂ ।
ਰੰਗ-ਬਰੰਗੇ ਸੋਹਣੇ ਪੰਛੀ,
ਏਥੋਂ ਤੁਰਦੇ ਹੋਏ,
ਥੋੜੇ ਉੱਲੂ-ਬਾਟੇ ਰਹਿ ਗਏ,
ਬੈਠੇ ਜੰਡ-ਕਰੀਰਾਂ ।
ਅਪਣੀ ਬੋਲੀ, ਅਪਣੀ ਧਰਤੀ,
ਛੱਡਿਆਂ ਕੁਝ ਨਹੀਂ ਰਹਿੰਦਾ,
ਕੁਦਰਤ ਮਾਫ਼ ਕਦੇ ਨਹੀਂ ਕਰਦੀ,
'ਆਸ਼ਿਕ' ਇਹ ਤਕਸੀਰਾਂ ।
No comments:
Post a Comment