ਮਨਫ਼ੀ ਹੋਇਆ ਪਿਆਰ ਘਰਾਂ ਵਿਚ - ਤ੍ਰੈਲੋਚਣ 'ਲੋਚੀ'
ਆਇਆ ਕੀ ਬਾਜ਼ਾਰ ਘਰਾਂ ਵਿਚ |
ਮਨਫ਼ੀ ਹੋਇਆ ਪਿਆਰ ਘਰਾਂ ਵਿਚ |
ਘਰ ਵਰਗਾ ਕੁਝ ਨਜ਼ਰ ਨਾ ਆਵੇ,
ਚੱਲੇ ਕਾਰੋਬਾਰ ਘਰਾਂ ਵਿਚ |
ਕੰਧਾਂ-ਕੌਲੇ ਗਲ ਲੱਗ ਰੋਵਣ,
ਤੱਕ ਤੱਕ ਕੇ ਤਕਰਾਰ ਘਰਾਂ ਵਿਚ |
ਜੋੜ ਤੋੜ ਵਿਚ ਉਲਝ ਗਏ ਨੇ,
ਮਿਲਦੇ ਨਾ ਹੁਣ ਯਾਰ ਘਰਾਂ ਵਿਚ |
ਪਹਿਲੋਂ ਕੇਹੜਾ ਘੱਟ ਦੁਖੀ ਹਾਂ,
ਕੀ ਕਰਨੇ ਅਖ਼ਬਾਰ ਘਰਾਂ ਵਿਚ |
ਤੁਰ ਜਾ 'ਲੋਚੀ' ਦੂਰ ਕਿਤੇ ਹੁਣ,
ਮਿਲਦਾ ਨਹੀਂ ਕਰਾਰ ਘਰਾਂ ਵਿਚ |
ਆਇਆ ਕੀ ਬਾਜ਼ਾਰ ਘਰਾਂ ਵਿਚ,
ਮਨਫ਼ੀ ਹੋਇਆ ਪਿਆਰ ਘਰਾਂ ਵਿਚ |
No comments:
Post a Comment